Skinkuhorn eru vinsæl í barnaafmæli og veislur. Einnig er tilvalið að baka þau til að frysta og eiga til þegar gesti ber að garði 🙂
Skinkuhorn
5 dl mjólk
15 gr þurrger (50 gr ferskt ger)
60 gr sykur
720 gr hveiti (14 dl)
1/2 tsk salt
150 gr smjör við stofuhita
Skinka
Ostur að eigin vali
1. Velgið mjólkina og stráið þurrgerinu yfir (eða leysið ferska gerið upp í henni). Blandið saman þurrefnunum (hveiti, sykri, salti) og hellið mjólkinni yfir. Skerið smjörið í bita og setjið út í. Hnoðið í höndunum eða í hrærivél í 5 – 10 mínútur. (ATH: ég þurfti að bæta svolítið af hveiti við til að fá góða áferð á deigið, prófið ykkur aðeins áfram ef ykkur finnst það blautt). Látið hefast í ca. klst.
2. Skiptið deiginu í tvo jafnstóra helminga. Fletjið hvorn helming út í aflangan ferhyrning. Skerið hvort stykki í u.þ.b. 10 þríhyrninga.
3. Setjið skinku og ost á breiðari endann á hverjum þríhyrningi og rúllið honum svo upp í horn. Leggið á bökunarplötu, penslið með eggi og látið hefast í ca. hálftíma.
4. Bakið við 200 gr. c í ca. 10 mínútur.
Eldhússystur 