Um síðustu helgi fengum við góða gesti í mat og þegar svo er nýti ég yfirleitt tækifærið og prófa einhvern nýjan eftirrétt. Eiginmanninum finnst þetta misskemmtilegt, hann á sínar uppáháldskökur sem hann myndi helst vilja að ég gerði aftur og aftur (t.d. þessa sítrónukladdköku sem hann hættir ekki að tala um 😉 ) Allavega. Honum varð ekki að ósk sinni í þetta skiptið fremur en önnur, ég var búin að finna í síðasta tölublaði Hembakat þessa ljúffengu súkkulaðikaramellutertu og hún olli engum vonbrigðum enda algert nammi. Tilvalin um páskana fyrir þá sem langar í ljúffengt súkkulaði en langar ekki í dísætt páskaegg 🙂
Daim- og súkkulaðipæ
Ca 12 bitar
Botn
125 gr smjör
¾ dl sykur
2,5 dl hveiti
3 dl haframjöl
Salt á hnífsoddi
Súkkulaðikaramella
3 dl rjómi
1 dl ljóst síróp
2 dl sykur
1 msk kakó
½ tsk edik
50 gr smjör
100 gr dökkt súkkulaði (í bitum)
Til skrauts
150 gr daim, hakkað
Aðferð
Ofninn stilltur á 200°c
Botn
Hrærið þurrefnunum saman og klípið smjörið saman við þar til deigið er orðið grófkorna. Það má líka setja öll innihaldsefninn í matvinnsluvél. Þrýstið deiginu í pæ-form eða springform (ca. 24 cm). Búið til deig-kant, ca. 2 cm háan. Bakið í u.þ.b. 20 mínútur og látið svo kólna.
Súkkulaðikaramella
Setjið rjóma, síróp, sykur og kakó í pott og látið suðuna komið upp. Látið malla þar til karamellan er orðin 120°c – ætti að taka 15 – 20 mínútur. Bætið þá edikinu út í og hrærið vel. Takið pottinn af hellunna og bætið smjöri og súkkulaði út og látið bráðna í karamellunni. Hrærið þar til karamellan er slétt og fín.
Hellið karamellunni í bökuskelina. Látið kólna. Stráið daim-súkkulaðinu yfir og setjið í kæli og látið stífna alveg. Mjög gott að bera fram með rjóma
Eldhússystur 