Haustgrýta með kantarellusveppum

Þegar sígur á seinnihluta sumarsins í Svíþjóð þá fyllist allt af kantarellusveppum. Þeir eru bókstaflega út um allt (í búðum aðallega hvað mig varðar, ég hef ekki enn prófað að fara og týna sjálf…). Við höfum ekki verið dugleg að nota þá hinsvegar þegar þeir eru „in season“ – sennilega aðallega vegna kunnáttuleysis, ég hef ekki lagt mig nógu mikið fram um að finna uppskriftir þegar þeir fást.

Ég fann samt þessa uppskrift um helgina og leyst vel á. Binni eldaði og sagði við mig þegar hann var búinn að elda: „þetta bragðast eins og Svíþjóð!“. Og ég er eiginlega bara alveg sammála honum, það er alveg einstaklega sænskt bragð af honum. Og gott var þetta – herregud! Sósan var ótrúlega góð – við bárum þetta fram með brauði og sem betur fer, þá var hægt að nota það til að moka sósunni upp í sig, annars hefði ég sennilega náð í skeiðar fyrir okkur! Þetta var alger hittari hjá allri fjölskyldunni 🙂

Tvær athugasemdir samt, ég myndi fara varlega í saltið og fondinn – hann hefði ekki mátt vera mikið saltari hja okkur og hinsvegar var þetta afskaplega mikið kjöt fyrir okkur, dugar í tvær máltíðir (en við erum reyndar ekki mjög miklar kjötætur). Og jú – ef þið finnið ekki kantarellur má auðvitað skipta sveppunum út fyrir annars konar sveppi sem þið finnið 🙂