Ég bakaði þetta sítrónubollu-brauð um síðustu helgi, eða hvað á maður annars að kalla svona brauð-bollu samsetningu? Maður kallar auðvitað svona gerbakstur meira snúða en bollur á Íslandi, ég er kannski farin að rugla sænskunni fullmikið saman við íslenskuna? Hvað um það – það fatta örugglega allir hvað ég á við 🙂
Hvað um það, þetta var einfalt (myndi ekki ganga svo langt að kalla þetta fljótlegt samt) og æðislega gott. Ég gerði eina og hálfa uppskrift til að geta sett í venjulega ofnskúffu og átti nóg til að stinga í frysti og kjamsa svo á í gær á ritgerðarskrifa/frídeginum mínum 🙂
Sítrónubollu-brauð
Fylling
75 g smjör, við stofuhita
100 gr rjómaostur
1,5 dl flórsykur
1 msk vanillusykur
Rifinn börkur af 1 sítrónu
Deigið
2,5 tsk þurrger (25 gr ferskt ger)
3 dl mjólk
75 gr smjör, við stofuhita
½ dl sykur
Salt á hnífsoddi
7 – 8 dl hveiti
Aðferð
Fylling: Hrærið öll hráefnin í fyllinguna saman. Setjið litlar kúlur, ca 40, á disk og setjið í frysti í u.þ.b. klst.
Deig: Hrærið þurrgerinu og sykrinum út í hveitið ásamt saltinu. Bætið smjörinu og mjólkinni út í hnoðið vel. Látið hefa sig undir viskastykki í u.þ.b. 40 mínútur.
Setjið deigið í smurða ofnskúffu (u.þ.b. 29 x 32 cm stóra). Notið hendurnar til að þrýsta deiginu jafnt í skúffuna. Látið hefa sig í u.þ.b. 30 mínútur undir viskastykki.
Stillið ofninn 200°c. Gerið u.þ.b. 40 holur í deigið með fingrunum og setjið frysta kúlu í hverja holu.
Penslið deigið með eggi (sem er búið að slá í sundur). Ef þið eigið perlusykur þá stráið þið ríflega af honum yfir (ég held hann fáist ekki heima þannig að það má alveg sleppa honum). Bakið í miðjum ofni í 18 – 25 mínútur. Leyfið brauðkökunni að kólna aðeins og skerið síðan í bita.
Eldhússystur 