Osta- og eplaskonsur

Ég verð að viðurkenna að það ætlar að reynast mér þrautin þyngri að finna eitthvað til að baka sem er ekki mjög óhollt. Þetta er víst ekki alveg mín sérgrein 🙂

Ég fékk vinkonu í kaffi um helgina og fann uppskrift að osta- og eplaskonsum frá Smitten Kitchen á netinu. Mér fannst þær ferlega góðar (og reyndar held ég kaffigestinum líka) og sennilega hefur ekki spillt fyrir að þær minna mjög á uppáháldseplakökuna mína sem er einmitt með osti í (það er klárlega uppskrift sem við þurfum að deila með umheiminum sem fyrst).

Allavega, ég vissi semsagt af fyrri reynslu að epla/osta-kombóið er hrikalega gott og þannig hafa þessar skonsur talað mjög til mín frá því að ég sá uppskriftina fyrst. Mér datt svo í hug að prófa að baka þær aftur og gera þær örlítið hollar með því að skipta venjulega hveitinu út fyrir heilhveiti og nota léttmjólk í staðin fyrir rjóma. (Ég er ekki með neitt almennilegt í staðin fyrir sykur, ef þið eruð með uppástungur að því er það vel þegið). Ég verð að segja að mér fannst skonsurnar síst verri svona, þær virkuðu alveg jafn vel svona aðeins hollari 🙂

Osta- og eplaskonsur

2 stór epli eða 4 lítil, helst í súrari kantinum.
210 gr heilhveiti
50 gr sykur
1/2 msk lyftiduft
1/2 tsk salt
85 gr kalt smjör, skorið í litla bita
40 gr cheddar ostur eða annar ostur
4 msk (60 ml) léttmjólk
2 egg

Ofninn hitaður í 190 gr.

Eplin eru afhýdd, kjarninn tekinn úr þeim og þau skorinn í litla bita. Sett á ofnplötu (klædda með bökunarpappír) og bökuð í u.þ.b. 20 mínútur (þau eiga að vera farin að þorna aðeins og jafnvel brúnast í kantana). Eplin eru svo kæld (það má setja þau í ískáp eða frystinn til að flýta fyrir).

Heilhveiti, sykri, lyftidufti og salti hrært vel saman í skál.

Þegar eplin eru orðin köld er þeim og ostinum blandað saman við hveitiblönduna. Að lokum er smjörinu, léttmjólkinni og einu eggi blandað saman við. Best er að nota „Ká-ið“ á hrærivélinni til að hræra þetta saman (hef einnig haft spurnir af því að hnoðarinn/deigkrókurinn sé að virka vel). Það á að hræra þannig að deigið blandist vel en ekki hræra of mikið, bara rétt þangað til deigið loðir saman (og já, það verða heilir smjörbitar eftir). Deigið verður mjög lint og klístrað. Það mætti líka gera þetta í höndunum en þá verður að mylja smjörið betur niður  í hveitið með höndunum áður en maður bætir vökvanum út í.

Setjið deigið á hveitistráð borð, það er ráð að setja VEL af hveiti á borðið. Setjið svo enn meira hveiti ofan á deigið. Mótið hring úr deiginu sem er ca. 20 cm í þvermál. Skerið hringinn í 8 jafnstóra bita. Takið hvern bita fyrir sig og setjið á bökunarpappír á ofnplötu. Hafið smá bil á milli bitanna

Sláið eggið sem eftir er í sundur og penslið hvern bita með því. Stráið örlitlum sykri ofan á.

Bakið í u.þ.b. 30 mínútur eða þangað til skonsurnar eru gullinbrúnar. Látið kólna aðeins.

Skonsur eru almennt bestar heitar og nýbakaðar en eru svona þolanlegar daginn eftir. Ef þið ætlið ekki að borða þær allar strax myndi ég frekar frysta þær og skella í ristina í smá stund frekar en að láta þær standa á borðinu.