Hafrakökur með smjörkremi

Ég er búin að vera ein heima um helgina með börnunum og fannst tilvalið að nota tímann (að hluta að minnsta kosti…) til að prófa eitthvað nýtt í bakstursdeildinni. Fyrir valinu urðu (m.a.) þessar seigmjúku hafrasmákökur með smjörkremi sem ég hef oft séð á vafri mínu um veraldarvefinn. Börnin urðu gjörsamlega sjúk í þær (kannski ekkert skrítið þar sem þetta eru ekki beint neinar hollustukökur, en þá sjaldan maður lyftir sér upp 😉 ) – SJÚKLEGA góðar! 

Get alveg mælt með þessum sem viðbót í jólabakstursflóruna 🙂 

(ég gerði hálfa uppskrift og fannst það alveg nóg svona til að smakka og eiga nokkrar afgangs) 

Hafrakökur með smjörkremi 

280 gr smjör 
2,5 dl púðursykur 
1,25 dl sykur 
1 nesbúegg 
1 tsk vanilludropar 
3,75 dl Kornax hveiti 
1 tsk matarsódi 
½ tsk salt 
3 bollar haframjöl 

Smjörkrem 

120 gr smjör 
5 dl flórsykur 
2 msk rjómi 
1 tsk vanilludropar 

Hitið ofninn í 175°c. 

Þeytið smjör og sykur vel saman, u.þ.b. 3 – 5 mínútur. Bætið við vanilludropum og eggi og þeytið vel, u.þ.b. 2 mínútur. Bætið hveiti, matarsóda og salti út í og hrærið þar til allt hefur blandast. Bætið að lokum haframjölinu út í og blandið saman við með sleif. 

Klæðið ofnplötur með bökunarpappír. Notið ca. ½ msk af deigi fyrir hverja köku, passið að hafa gott bil á milli því þær fletjast út (ath. stærðin er að sjálfsögðu smekksatriði, það má hafa þær stærri en þá verða þær ansi stórar). 

Bakið í 7 – 9 mínútur, eða þar til brúnirnar á kökunum verða gullinbrúnar. Látið kökurnar kólna alveg áður en kremið er sett á. 

Krem: Setjið öll hráefnin í skál og þeytið saman í 2 – 3 mínútur. 

(Uppskrift fengin héðan)