Piparkökuhús 2012

Við systurnar höfum haft það fyrir sið nokkur undanfarin ár að hittast og baka saman piparkökur og búa til okkar eigið piparkökuhús. (hér má sjá myndir af afrekum undanfarinna ára) Okkur langaði alltaf til að gera piparkökuhús sem börn og auðvitað á maður að láta draumana rætast, stóra sem smáa 😉 Síðasta helgi var piparkökuhelgin mikla 2012 – Tobba ferðaðist alla leið frá suður-Svíþjóð með dætur sínar til að láta verða af þessu 🙂

Við notum piparkökudeigið frá mömmu til húsagerðarinnar (sjá hér), það sama og við notum til að búa til venjulegar piparkökur. Til að líma húsið saman notum við „royal icing“ – en það er flórsykurblanda, búin til úr eggjahvítum, sítrónusafa og flórsykri. Þetta virkar þrælvel, er ætt og engin hætta á að brenna sig 🙂

Royal Icing

330 gr flórsykur
2 tsk sítrónusafi
2 eggjahvítur

Eggjahvíturnar og sítrónusafinn þeytt saman þangað til freyðir. Flórsykrinum bætt út í og þeytt þar til topparnir standa nokkurn vegin sjálfir. Geymið í lokuðu íláti.

Ég ætla annars bara að leyfa myndunum að tala sínu máli af verkefninu.