Ég gerði þessar ljúffengu piparköku- og marsípantrufflur um daginn. Var ég nokkuð búin að segja ykkur að Svíar eru svoldið trylltir í allt piparköku-eitthvað þegar nær dregur jólum? Ég virðist hafa smitast allsvakalega af þessari veiki núna og gat ekki staðist þetta kombó, piparkökur og marsípan. Ég meina í alvöru talað – hvernig getur þetta ekki verið gott? Við vorum allavega frekar fljót að klára þetta 😉
Piparköku- og marsipantrufflur
75 gr piparkökur (ca 12 st)
100 gr odense marsípan
3 msk mjúkt smjör
1 msk koníak (ef vill)
200 gr hvítt súkkulaði
Myljið piparkökurnar alveg.
Rífið marsípanið niður.
Blandið saman við piparkökurnar, smjörið og koníakið.
Búið til litlar kúlur úr deiginu, ca. 15 stykki.
Bræðið súkkulaðið og dýfið kúlunum í það.
Skreytið með muldum piparkökum.
Geymið í kæli.
Eldhússystur 